Habe d'Ehre oisam midanand!

Wia väi gibt's an no? Vo dene, de wo Dialekt ren, moan i?
Ja, i sog absichtlich "de wo"!
Sogor af Bayern is scho durchdrunga, dass des grammatikalisch koa bregge ned stimmt (Doppede Verneinung, aa a boarisch's Dialektphänomen!). Intressiad aber ned.
Es gähd ned drum, dass ma mia de Grammatikprofis der Nation wean oda sei woin! Na! Es gähd oafach grod drum, dass ma mia unsan Dialekt dahoiddn woin. Genau wia so väi andere a!
Oder sogt's ma oan, dea wo heid no platt redt und dabei peinlichst draf Obacht gibt, dass d'Grammatik stimmt! I kenn koan.
(Kannt aber aa dro liegn, dass i koan kenn, der Platt redt.)

Frale findt' jeda sein Dialekt am besten und olle andern grundsätzlich erscht amoi bläd.
De Hamburger ham a Problem mid'm Sächsischen, d'Thüringer finden s'Schwäbische greislich, d'Berliner ham grundsätzlich a Problem und d'Bayern grantln scho unter sich über de oanzlna Dialektvariantn.
Wer an da Grenz zu Österreich wohnt, figget über d'Franken, wer im scheena Minga lebt, motzt über d'Niederbayern und wer aus'm Woid kimmt, den vastähd sowieso koana.
De, de wo (!) goa koan Dialket ren, ham naddiale a grundsätzlichs Problem: Neid. Aa, wenn's es ned zuagem. Aber sad's doch ehrlich! Is Mundart ned wos Scheens?

I war amoi af a Schulung über kundenorientierte Kommunikation. Damit i ja ned affoi, hob i mi naddiale ogstrengt, dass ma ned gspannt, dass i eigentlich Dialekt red. Naddiale konn ma des ais waschechter Niederbayer ned verleigna, aa da Schulungsleiter hod's boid gspannt. Und wisst's, wos a gsagt hod: "Bitte verleugnen Sie Ihren Dialekt nicht, der macht Sie so sympathisch!"
Frale konn i ned ren, wia ma da Schnowe gwachsn is, wenn i äbban aus Norddeitschland am Telefon hob. Aber i konn mi zamt'm Dialekt bemüh'n, dass er mi vastähd.

Mi fasziniert Mundart oafach! I gfrei mi, wenn i vo meim Opa a diamoi a Wort afschnapp, des wo no ned amoi i kenn - und i red fei wiaggle broads Boarisch! Sächane Wörter bewahr i ma. De san a Schatz, der unweigerlich valorn geh werd. Scho alloa desweng, weil in de Schuin immer weniger dalaabt werd, dass Mundart gredt' werd! Ewig schood! Glangt's denn ned, dass ois in Hochdeitsch gschriem sei muass? Muass ma Kinder, de wo dahoam Mundart ren, dazua zwinga, dass' in da Schui Hochdeitsch ren? Mit der Folge, dass' dann goa nimma ren, weil sa se nix mehr song draun! I moan, des is ned richtig. Bloß weil's a boor so Zwiederwurzn, de aggrat in da Politik hoggan, ned hern kinnan, wenn Dialekt gredt werd, werd a kurzerhand vabotn.

Ehrlich: i mog mein Dialekt! I stäh voi dahinter und i praktizier'na aa!
Und soiad i tatsach wider Erwarten Kinder in 'dWäidd setzn, dann wern de garanddiad boarischsprachig afwachsen.
I bin aa boarisch erzogn worn - in jeder Hinsicht. Und trotzdem bin i fähig, an astreina hochdeitschn Text zum schreim. Muass i ma do jedsmoi den Baatz einedrugga lassn, von wegen, dass ma mia Bayern koa Deitsch ned kinnan! Des is doch ois a Grampf. Mia kimma grod so guad Deitsch, wia d'Sachsn (wenn's meng), oder wia d'Fischkäpf!

Frale head ma, ob oana Dialekt redt, oda ned. Aber amoi ehrlich: macht ned aggrat des oan wiaggle liebenswert? Gähd's Eich ned aa a diamoi a so, dass Eich as Herz afgeht, wenn's merkt's: do bemüht si oana, dass er si vaständlich fia Eich ausdruckt, aber eigentlich mächad mit olla Gwoid as Schwäbische oda as Berlinerisch oder aa as Boarisch durchkemma!
Dialekt is doch wos Scheen's! Bittscheen, verdeifet's 'n ned a so!

So, und af des affe briah i ma jetz an Bräslkaffä und iss a Scheil Apfeschdrul dazua.

Vergelt's Gott fia's Lesen!